Ukraina baş naziri Arseniy Yatsenük dedi ki, dünya Rusiyeniñ Qırım işğaline qarşı çıqtı ve Ukrainağa onıñ toprağını, qırımtatar halqına ise vatanını keri qaytarmaq kerek.
Bunı o mayıs 18-de Kiyevde hatıra aqşamında ayttı, dep bildire Ukraina ükümetiniñ matbuat hızmeti.
«Şimdi siziñ toprağımız, bizim toprağımız vaqtınca işğal etildi. Er kes Qırım işğalini takbih ete, bütün dünya buña qarşı çıqtı. Bizim vazifemiz – sözde degil, işte Ukrainağa Qırımnı, qırımtatar halqına ise onıñ toprağını keri qaytarmaqtır», – dep qayd etti o.
Matbuat hızmeti bildire ki, Yatsenük sürgünlik yıllığına toplaşqanlarnı qırımtatarca selâmladı.
Ükümet reisi çıqışta bulunıp, qırımtatar halqı çoq şeyni yaşadı, amma onı yoq etemegenlerini qayd etti.
«İç bir kimse iç bir vaqıt qırımtatar halqınıñ milliy qıymetini yoq etemez – bunı sizler topraq ve halq içün küreşip isbatladıñız», – dep qayd etti Yatsenük.
Mayıs 18-de Kiyevde ve Ukrainanıñ diger şeerlerinde, em de çetelde Qırımtatar halqı sürgünliginiñ qurbanlarınıñ hatırasına matem tedbirleri olıp keçti. Bu kün 1944 senesi yarımadadan qırımtatarlarnen tolu birinci eşelon Orta Asiyağa yollanğan edi.
2014 senesi mart ayında yarımadada dünyada tanılmağan «referendum» keçirilgen soñ Rusiye Qırımnı işğal etti.
