Bazarertesi künü, mayıs 18-de, Qurman rayonınıñ Büyük Onlar (Oktâbrskoye) qasabasında sürgünlik qurbanlarınıñ abidesi yanında 1944 senesi sürgünlik neticesinde elâk olğanlarnı añmaq içün eki biñge yaqın insan toplaştı. Bunıñ kibi tedbirlerde icra etilgen qırımtatar gimni bu sefer yanğıramadı. Toplaşuvda iştirakçiler şiir oqudılar.
Tedbir teşkilâtçısı, Büyük Onlar regional meclisiniñ reisi Nuriddin Seytablayev Qırım.Aqiqatqa bildirdi ki, tedbir yerli akimiyet ile muzakere etilgen edi.
«Qasaba yolbaşçısı adına evelden ariza berdik, izin aldıq, politsiya, prokuratura yolbaşçısı ile bir de bir provokatsion areketler olmaycağını muzakere ettik – bunı üzerimizge aldıq», – dep qayd etti o.
Seytablayevniñ aytqanına köre, qomşu qasabalardan da adamlar keldi.
«Elâk olğanlarğa olğan borcumıznı yerine ketirmek içün er yıl bu abide yanında toplaşa edik», – dep qayd etti yerli Meclisniñ reisi.
Seytablayevniñ malümatına köre, bir çoq adamnıñ qolunda qırımtatar bayrağı, elâk olğan soy-soplarnıñ fotoresimleri, cenk iştirakçileriniñ fotosüretleri bar edi.
«Bir de bir rezolütsiya ya da muracaatnı qabul etmedik, toplaşuvdan soñ er kesni camige barıp sürgünlikte elâk olğanlarn dua ile añmağa çağırdıq», – dep ayttı Büyük Onlar Meclisiniñ reisi.
30 daqqa sürgen tedbirde Qurman rayonı memuriyetiniñ yolbaşçısı Vladimir Ganaga, qasaba yolbaşçısı Vasiliy Grabovan, yerli faaller ve cemaatçılar iştirak etti.
Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.
Qırım işğalinden evel sürgünlik yıllığında Aqmescitte Bütünqırım matem mitingi keçirile edi, tedbirde onlarnen biñ insan iştirak ete edi.
Bu sene Qırımtatar Milliy Meclisine miting keçirmege izin bermediler.
Qırım akimiyeti sürgünlik qurbanlarınıñ hatıra kününiñ «yañı formatını» belgiledi.
Ukrainada ve çetelde mayıs 18-de qırımtatar sürgünliginiñ 71 yıllığına bağışlanğan bir sıra hatıra tedbiri ötkerilecek. Kiyevde Bütün Ukraina matem mitingi keçirilecek.
Kiyev, Harkov, Herson, Lviv ve Ukrainanıñ diger şeerleri, em de çetelde çoq biñli aktsiyalar ötkerildi.
