Aqmescitte qırımtatar sürgünligi yıllığına bağışlanğan mitingni keçirmek yasağı qırımtatarlar körgen sıñır ve qorquzuvlarnıñ daa bir örnegidir. Bunı Avropa Birliginiñ diplomatik hızmeti reisi Federica Mogherini qırımtatar sürgünliginiñ 71 yıllığı aqqında aytıp bildirdi.
«Tarihlarınıñ facialı devri edi», – dep qayd ete Mogherini. O, Avropa Birligi Rusiyeniñ Qırım işğalinden soñ milliy azlıqlarnıñ aq-uquqlarını bozuv ve umumen insan aqlarınıñ vaziyeti kerginleşkeninden sebep qasevet çekkenini daa bir kere hatırlattı.
«Keçüv, fikir ve kütleviy haber vastalarınıñ serbestligi ürmet etilmeli. Halqara uquq qorçalayıcı teşkilâtlarnıñ vekilleri Ukraina, şu cümleden Qırım ve Aqyarğa serbest kirmeli», – dep ayta Avropa Birliginiñ tışqı siyaset ve havfsızlıq siyaseti vekili.
Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.
Qırım işğalinden evel sürgünlik yıllığında Aqmescitte Bütünqırım matem mitingi keçirile edi, tedbirde onlarnen biñ insan iştirak ete edi.
Bu sene Qırımtatar Milliy Meclisine miting keçirmege izin bermediler.
Qırım akimiyeti sürgünlik qurbanlarınıñ hatıra kününiñ «yañı formatını» belgiledi.
Ukrainada ve çetelde mayıs 18-de qırımtatar sürgünliginiñ 71 yıllığına bağışlanğan bir sıra hatıra tedbiri ötkerilecek. Kiyevde Bütün Ukraina matem mitingi keçirilecek.
Kiyev, Harkov, Herson, Lviv ve Ukrainanıñ diger şeerleri, em de çetelde çoq biñli aktsiyalar ötkerildi.
