Bazarertesi künü, mayıs 18-de, Qırım camilerinde qırımtatar halqı srgünliginiñ qurbanları ruhuna dualar oquldı.
Qırım musulmanları diniy idaresi bildirgeni kibi, Aqmescitniñ Kebir camisine kelgen er insan sığmağanından sebep, musulmanlar cami azbarında dua etken edi.
Aqmescitniñ merkeziy camisinde duanı Qırım musulmanlarınıñ diniy yetekçisi hacı Emirali Ablayev keçirdi.
«Duadan evel müfti kelgenlerni selâmladı ve sürgünlik – qırımtatarlarnıñ yüreklerinde facialı bir yara olğanını ayttı. İşbu yaranı olar qıyamet kününe qadar unutmayıp, qabaatsız elâk olğan qurbanlarnıñ hatırasına ebediyen göñüllerinde saqlaycağını qayd etti», – denile bildirüvde.
Bazarertesi künü, mayıs 18-de, Qırımdan qırımtatar halqınıñ sürgünligi 71 yıllığı munasebeti ile Ukraina ve tışında bir sıra hatıra tedbiri keçirilecek.
Şu künleri Kiyev, Harkov, Herson, Lviv ve diger şeerlerde de bu kibi tedbirler keçirildi.
Er sene Qırımda sürgünlik yıllığı munasebeti ile kütleviy tedbirler, şu cümleden Aqmescit merkezinde matem mitingi keçirile edi. Amma Rusiyeniñ Qırımnı zapt etkeninden soñ Aqmescit merkezinde bu kibi tedbirlerni keçirmege yasaq ettiler.
Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi
