Meclis reisi Refat Çubarov qırımtatar halqı sürgünliginiñ 71 yıllığında yarımadada yaşağan semetdeşlerini sabır etmege çağıruvı ile video muracaatnı yazdı
«Sayğılı ağa ve ablalar, bir yıl evelsi başımızğa yañıdan kelgen zorluqlar inşaAllah yoq olacaqtır, Qırımnı basıp alğan rus işğalcileri bizim toprağımızdan qaçmağa mecbur olacaqtır. Bizler epimiz bu quvanç künlerini yaqınlaştırmaq içün areket etemiz», – dey Çubarov.
«Amma ne olsa da, buña bazı vaqıt kerek olacaq. O sebepten, Qırımdaki milletimiz ve Qırımnıñ tışında mecburiy olğanlarımız birlikte olayıq. Añlaymız, bugün eñ büyük zorluqlarnı Qırımdaki vatandaşlarımız çeke. Allah sizge çoq sabır ve küç bersin. Allah epimizge Vetanımızda kene bir arağa kelmege nasip etsin», – dedi Meclis reisi.
Bazarertesi künü, mayıs 18-de, Qırımdan qırımtatar halqınıñ sürgünligi 71 yıllığı munasebeti ile Ukraina ve tışında bir sıra hatıra tedbiri keçirilecek.
Şu künleri Kiyev, Harkov, Herson, Lviv ve diger şeerlerde de bu kibi tedbirler keçirildi.
Er sene Qırımda sürgünlik yıllığı munasebeti ile kütleviy tedbirler, şu cümleden Aqmescit merkezinde matem mitingi keçirile edi. Amma Rusiyeniñ Qırımnı zapt etkeninden soñ Aqmescit merkezinde bu kibi tedbirlerni keçirmege yasaq ettiler.
Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.
