Ukrania prezidenti Petro Poroşenkonıñ fikrine köre, qırımtatar halqınıñ sürgünliginiñ 71 yıllığında qırımlılarnı, qırımtatarlarnı da, şu cümleden, kene Vatan aqqından marum qaldıralar.
Bu aqta devlet başınıñ Facebook saifesinde aytıla.
«Tarih dersleri pek kâmil. Öz areketlerini nasıl bir şiarlar ile aqlamağan zalımlar episi bir yutar. İç bir diktator bütün halqnıñ küçüni yeñip olamaz», – denile bildirüvde.
«Dünyace belli yetekçileri – Mustafa Cemilev ve Refat Çubarov – olğan halqnı yeñmege imkânsız. Qırım – Ukrainanıñ ayırılmaz qısmı! Biz – yekâne ukrain halqımız!», – dey Poroşenko.
Evel bildirilgeni kibi, qırımtatarlarnnı yetekçileri Mustafa Cemilev ve Refat Çubarovğa Rusiye akimiyeti Qırımğa kirişlerini yasaqladı. Yıl devamında yarımadanı bir sıra qırımtatar faalli ve uquq qoruyıcı terk etti.
Bazarertesi künü, mayıs 18-de, Qırımdan qırımtatar halqınıñ sürgünligi 71 yıllığı munasebeti ile Ukraina ve tışında bir sıra hatıra tedbiri keçirilecek.
Şu künleri Kiyev, Harkov, Herson, Lviv ve diger şeerlerde de bu kibi tedbirler keçirildi.
Er sene Qırımda sürgünlik yıllığı munasebeti ile kütleviy tedbirler, şu cümleden Aqmescit merkezinde matem mitingi keçirile edi. Amma Rusiyeniñ Qırımnı zapt etkeninden soñ Aqmescit merkezinde bu kibi tedbirlerni keçirmege yasaq ettiler.
Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.
