Link açıqlığı

Ukraina halq deputatları, cemaat erbapları mayıs 18 künü Kiyevniñ Mustaqillik Meydanında qırımtatarlarnıñ sürgünligi qurbanlarını añmağa çağıralar.

Kiyevde keçirilecek matem tedbirleri aqta Ukraina halq deputatı, Ukraina prezidentiniñ qırımtatarlarnıñ işlerinden vekâletlisi Mustafa Cemilev hatırlata.

«Bugün Kiyevde ve Ukrainanıñ diger şeerlerinde 1944 senesi deşetli vaqialarınıñ, qırımtatar halqınıñ genotsidi qurbanlarınıñ hatırasına, XXI asırda kene işğal şaraitlerine rastkelgen Qırım tamır halqına qol tutuv ve matem tebdirleri, miting ve toplaşuvlar keçecek», – dep bildire Mustafa Cemilevniñ matbuat hızmeti.

Maydanğa kelmek çağıruvı ile Ukrainanıñ diger halq deputatı Georgiy Logvinskiy de muracaatta buluna.

«Bugün Kiyevniñ er bir sakininiñ borcu– Meydanğa kelmek! Bugün – qırımtatarlarnıñ sürgünlik künü – Stalin rejiminiñ eñ büyük cinayetidir. Bugün er birimiz – qırımtatarımız. Sözde degil, amelde olsun», – dey o.

Qırımtatarlarnıñ milliy areket yetekçi ve faalleriniñ iştiraki ile matem mitingi bazarertesi künü saat 18:00 Mustaqillik Meydanında keçirilecek.

Bazarertesi künü, mayıs 18-de, Qırımdan qırımtatar halqınıñ sürgünligi 71 yıllığı munasebeti ile Ukraina ve tışında bir sıra hatıra tedbiri keçirilecek.

Şu künleri Kiyev, Harkov, Herson, Lviv ve diger şeerlerde de bu kibi tedbirler keçirildi.

Er sene Qırımda sürgünlik yıllığı munasebeti ile kütleviy tedbirler, şu cümleden Aqmescit merkezinde matem mitingi keçirile edi. Amma Rusiyeniñ Qırımnı zapt etkeninden soñ Aqmescit merkezinde bu kibi tedbirlerni keçirmege yasaq ettiler.

Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.

XS
SM
MD
LG