Link açıqlığı

Bazarertesi künü, mayıs 18-de, Qırımlı ukrain yırcısı Camalanıñ «Artıñnı unutma» serlevalı yırı taqdim etildi.

Bu aqta yırcınıñ resmiy saytında bildireler.

Camalanıñ sözlerine köre, о, bu yırnı evge yolnı qıdırğanlarğa bağışladı.

«Ev – pasportta şu yer er vaqıt müür ile belgilenmese bile, mında seni seve ve er vaqıt bekleyler», – dey yırcı.

«Baba ve qartanam maña qırımtatarlarnıñ Vatanğa avdeti qıyın olğanı aqta tarif ete edi. «Artıñnı unutma» – babam ile subetimizniñ devamı. Baba evinden oquşqa ketkende, o maña er vaqıt: Artıñnı unutma – dey edi, evden ketkende, eviñ bar olğanını unutma, tez qayt manasında. Soñunda ise: «ozüñe baq» dep ozğara edi», – tarif ete Camala.

Şu künleri yırcı Kiyevde «Yüregiñde ateş yaq» aktsisında iştirak etti. İştirakçilerge muracaat etip, Camala bu facianı baştan keçirgen ve sürgünlikte elâk olğanlarnı añıp, çıraq yaqmağa çağırdı.

Bazarertesi künü, mayıs 18-de, Qırımdan qırımtatar halqınıñ sürgünligi 71 yıllığı munasebeti ile Ukraina ve tışında bir sıra hatıra tedbiri keçirilecek.

Şu künleri Kiyev, Harkov, Herson, Lviv ve diger şeerlerde de bu kibi tedbirler keçirildi.

Er sene Qırımda sürgünlik yıllığı munasebeti ile kütleviy tedbirler, şu cümleden Aqmescit merkezinde matem mitingi keçirile edi. Amma Rusiyeniñ Qırımnı zapt etkeninden soñ Aqmescit merkezinde bu kibi tedbirlerni keçirmege yasaq ettiler.

Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.

XS
SM
MD
LG