Link açıqlığı

Bazar künü, mayıs 17-de, bir qaç ateş kürresi kökke uçurıldı. Böyleliknen, akimiyet tarafından azırlanılğan hatıra tedbirlerinde iştirak etmege istemegen qırımtatarlar sürgünlikte elâk olğanlarnı añdılar.

«Kökke ateş kürresini yollaymız. Vatanı, Qırımğa qaytıp olamağanlarnı añamız. Er şey tez keçe, er şeyniñ başı ve soñu bar dep, kökke kürrelerni yiberemiz, bugün-yarın Rusiye işğali de soñuna yeter», – dey Qırım.Aqiqatqa Yağmurça (Fontanı) qasabasınıñ sakini Gülnara.

Ateş kürreleri şeerniñ diger rayonlarında da uçurıldı, atta Qırım akimiyeti «Yüregiñde ateş yaq» aktsiyasını keçirgen Lenin meydanında da körülgen edi.

«Yüregiñde ateş yaq!» aktsiyası er yıl Qırımtatar yaşlar merkezi tarafından keçirile edi. 2007 senesinden başlap Aqmescitniñ Lenin meydanında keçirile edi, amma bıltır ve bu sene Qırımda Rusiye akimiyeti işbu teşkilâtqa hatıra aktsiyasını keçirmege izin bermey. Ğaye teşebbüsiçsi Qırımtatar Milliy Meclis azası Eskender Bariyev bu sene Qırımda bu aktsiyanı azırlağan insanlarnı «ğaye hırsızlavında» qabaatladı.

Qırımtatar halqınıñ sürgünligi 71 yıllığına bağışlanğan tedbirler Ukraina şeerleri ve çetelde keçti.

Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.

XS
SM
MD
LG