Link açıqlığı

Harkovda Qırımdan 1944 senesi sürgünligi vaqtında elâk olğan qırımtatarlarnı añdılar.

Radіo Svoboda bildirgeni kibi, bir elli insan Konstitutsiya meydanında toplandı. İnsanlar çıraqlardan Qırım yarımadası ve qırımtatarlarnıñ tuğrasını yaptılar.

Aktsiyada Qırımnıñ ve Rusiye nezaretinde olğan tamır halqınıñ şimdiki vaziyetine de diqqat ayırıldı. Aktsiyada «Qırım dostları» cemaat teşkilâtınıñ temsilcileri aytqanı kibi, qıtada yarımdanı terk etmege mecbur olğanlarğa, şu cümleden qırımtatarlarğa da faal yardım kösterile.

Ukrainada qırımtatar halqınıñ Qırımdan sürgün etilgenine bağışlanğan tedbirler keçirile. Mayıs 17 künü Kiyev, Lviv, Harkov ve Ukraina tışında bu munasebet ile bir sıra merasim ötkerildi. Şu cümleden, aktsiya iştirakçileri çıraqlardan Qırım haritası, «71» raqamı, Ukraina ve qırımtatarlarnıñ tuğrasını yapqan ediler.

«Yüregiñde ateş yaq» aktsiyası Aqmescitte de keçti. Tedbir keçirilgen meydançıq sarılıp alınğan edi. Territoriyağa kirmek içün metallodetektorlardan keçmege kerek edi, qadınlarnıñ çantaları, erkeklerniñ ceplerini baqıp çıqa ediler. Aktsiya keçirilmesi politsiya ve FSB hadimleri tarafından nezaret etildi.

Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.

XS
SM
MD
LG