Qırımtatar halqı sürgünliginiñ yıllığına bağışlanğan tedbirler çerçivesinde keçirilgen altıncı Çatırdağ seferinde (deñizden 1527 metrlik yükseklikte) aman-aman 4 biñ insan iştirak etti, dep bildireler onıñ teşkilâtçılar. Qırım dağınıñ töpesinde toplaşqanlar sürgünlik qurbanlarını dua ile añdılar.
Qırım.Aqiqat mühbiri bildire ki, cumaertesi künü, mayıs 16-da, saba saat 9-da aktsiya iştirakçileri Anğara boğazında toplaştılar. Sefer başlamazdan evel Qırım musulmanlarınıñ Müftisi acı Emirali Ablayev dua oqudı. Mında em gençler, em orta yaşlı insanlar, em de balalar bar edi.
Yol üç saatten ziyade sürdi. Yol devamında iştirakçiler «Millet! Vatan! Qırım!» şiarlarını seslendirdiler, em de «Allahu akbar!» ayttılar. Bazıları «Yaşasın Ukraina! Qaramanlar yaşasın!» dep qıçırdılar. Seferniñ bazı iştirakçileri - Ukrain medeniyet merkeziniñ temsilcileri - hatıra olaraq foto çıqarmaq içün Ukraina bayraqlarını aldılar.
Çatırdağnıñ töpesinde sefer iştirakçiyeri 1944 senesi sürgünliginde elâk olğanlarnı dua ile añıp, qırımtatar milliy gimnini icra ettiler. Bayraq altında berebar foto çıqarılğan soñ toplaşqanlar qaytmağa başladılar.
Tedbir teşkilâtçıları qayd eteler ki, qaytqan soñ Anğara boğazında «Qırım arslanları» adlı «samooborona» vekilleri tura edi.
Sefer iştirakçilerinden biri Qırım.Aqiqatqa bildirdi ki, o, dağğa çıqqanda yolçıqlarda biri qoyğan keskin mıhlar ile 10 tahtaçıqnı taptı. «Ne içün bunı yaptılar belli degil», – dep qayd etti o. Aktsiyanıñ diger iştirakçileri bunı eyi niyetleri olmağanlar yapqanını tahmin eteler.
Umumen alğanda, tedbir yahşı keçti.
«Çatırdağ seferi ananemiz ola – mayıs 18 sürgünliginiñ künü arfesinde, elâk olğanlarnı añmaq içün. Bu sene dört biñden ziyade kişi iştirak etti, keçken sene – üç biñ», – dep ayttı Qırım.Aqiqatqa tedbir teşkilâtçılarından biri, Qırımtatar Milliy Meclisiniñ azası Seydamet Yağyayev.
Onıñ qayd etkenine köre, seferni teşkil etken Qırımtatar Milliy Meclisi, Qırım musulmanları Diniy idaresi, qırımtatar cemaat ve gençler teşkilâtları tedbir keçirilmesi içün zarur olğan bütün vesiqalarnı aldılar.
Seydamet Yağyayev kelecekte de bu anane saqlap qalacağına ümüt ete, çünki yıl-yıldan töpege çıqmağa istegenlerniñ sayısı ep arta.
