Aqmescitniñ Ressam evinde Qırımnıñ sürgün olunğan halqlarnıñ er yıllıq 26-ncı ressamlar sergisi açıldı.
Sergide 35 qırımtatar, bulğar, alman, yunan ve ermeni ressamlarınıñ 110 eseri numayış etildi. Resimlerniñ çoqusı Ramazan Üseinov, Ayder Aliyev, Zarema Trasinova, Alim Üseinov, İrfan Nafiyev, İsmet Şeih-zade, Nuri Yakubov, Ali Bekirov, Eldar Güsenov kibi qırımtatar ressamlarına ait.
Sergini Ressamlar birliginiñ Qırım teşkilâtı idaresiniñ reisi Nikolay Morgun açtı.
«90-95% – qırımtatar ressamlarınıñ eserleridir. Bu halqnıñ küçüni köremiz. Kelecekke ümüt er bir işte mevcut <...> Em facianı, em de kelecekke ümütlerni köremiz... sürgünlikke bağışlanğan sergide mevzunen bağlı işlerniñ daa çoq olmasını ister edik. <...> Qırımtatar ressamlarını aytsam, büyük potentsialıñız bar», – dep qayd etti Nikolay Morgun.
Zalnıñ ortasında 25 yıl evelsi Qırım halqlarınıñ sürgünligine bağışlanğan birinci sergide yapılğan baner fotosı yerleştirildi. Tedbir soñunda ressam ve seyirciler onıñ üstünde imzalarını qaldırdılar.
