Link açıqlığı

Bir qaç biñ qırımtatarı sürgünlik qurbanlarını añmaq maqsadınen Çatırdağ seferine başladı


2014 senesi mayıs 10 künü Çatırdağ seferi, arhiv fotoresimi

Aman-aman üç biñ qırımtatarı cumarertesi künü, mayıs 16-da, saba Çatırdağ seferine keldi.

Qırım.Aqiqat mühbiri bildire ki, tedbir qırımtatar halqı sürgünliginiñ 71 yıllığına bağışlana.

Toplaşqanlar, esasen gençler, qollarında qırımtatar bayraqlarını tutalar. Sefer başlamazdan evel Qırım Müftisi Acı Emirali Ablayev toplaşqanlarğa muracaat etip, «qırımtatarlar eki büyük devlet arasında qalğanını» qayd etti ve «halqnı birleşmege ve siyasetnen oğraşmamağa» çağırdı.

Tedbir iştirakçileri «Millet! Vatan! Qırım!» şiarlarınen dağğa çıqalar.

Çatırdağnıñ eñ yüksek noqtasında 1944 senesi sürgünlikte elâk olğanlarnı dua ile añacaqlar ve qırımtatar milliy gimnini icra etecekler.

2010 senesinden itibaren Qırım gençleri Çatırdağ seferine keçireler. Gençler yarımadanıñ bütün köşelerinden kelip, 1944 senesi sürgünliginiñ qurbanlarını añalar.

Sefer Qırımtatar Milliy Meclisi, Qırım musulmanları diniy idaresi, qırımtatar cemaat ve gençler teşkilâtları tarafından teşkil etildi.

XS
SM
MD
LG