Link açıqlığı

Balbek mayıs 18-de Qırımda bütün din temsilcileriniñ umumiy duası keçirilecegini vade ete


Ruslan Balbek, arhiv fotoresimi

Qırımda mayıs 18-de Qırım halqları sürgünliginiñ qurbanlarını hatıra kününe bağışlanğan «Hatıra ve birlik duası» tedbiriniñ keçirilmesi planlaştırıla. Böyle bir qarar Qırım Nazirler şurasınıñ reis muavini Ruslan Balbeyek keçirgen Qırımnıñ «Dünya – Allahnıñ ediyesi» dinlerara şurasınıñ toplaşuvında alındı.

Qırım ükümetiniñ matbuat hızmeti bildire ki, tedbirniñ maqsadı – Qırımnıñ bütün din temsilcileri iştirak etecek umumiy duanı keçirmektir.

«Tüşüniñiz, mayıs 18-de saat 11-de er bir kilse, cami, kenasta aynı saatte barışıq ve başqa bir halqnıñ böyle bir faciağa oğramaması içün er bir din qanunlarına köre umumiy dua keçirilecek. Mence, qırımlılarnıñ birligi pekitilecek, bizim maneviy birligimiz de quvetleştirilecek», – dedi Ruslan Balbek.

O, toplaşuvda «Qırım halqları sürgünliginiñ qurbanlarını hatıra kününi siyasetten ayırmaq kerekligini» daa bir kere qayd etti.

Qırım.Aqiqat bildirgeni kibi, Aqmescitniñ Rusiye şeer memuriyeti Qırımtatar Milliy Meclisine sürgünlik yıllığına bağışlanğan matem mitingini keçirmege resmiy şekilde yasaq etti.

Aynı vaqıtta Meclis işğalci akimiyet tarafından provokatsion mitinglerniñ ötkerilecegini red etmey.

Qırım işğalinden evel sürgünlik yıllığında Aqmescitte Bütünqırım matem mitingi keçirile edi, tedbirde onlarnen biñ insan iştirak ete edi.

XS
SM
MD
LG