Kiyevdeki İvan Gonçar müzeyinde mayıs 16-dan iyün 28-ge qadar «Zıncır: hatıra alqaları» sergisi keçirilecektir. Sergini «El-Çeber» cemaat teşkilâtı, «Müzey İvana Gonçara» milliy halq medeniyet merkezi ve Qırımtatar Milliy Meclisi teşkil eteler.
Qırımlı Rustem Skibin Qırım.Aqiqat saytına bergen malümatına köre, sergi 1944 senesi mayıs 18-de totalitar rejimi tarafından yapılğan qırımtatar halqınıñ sürgünlik qurbanlarınıñ hatırası kününe bağışlana.
Sergide qırımtatar halqına qarşı yapılğan terrornı aks ettirgen vesiqalar, Ekinci cian cenkinde iştirak etken ve sürgünlikni başından keçirgen qırımtatarlarnıñ hatıraları, sürgünlik aqqında video levhaları numayış etilecek.
Bunıñnen beraber adamlarnı sürgün etken vaqıtta olğan oda kösterilecek. Leyha müellifleri olğan «El-Çeber» cemaat teşkilâtınıñ vekilleri deyler ki, odanıñ ayrı timsalleri halqnıñ facia müitini aks ettirmeli.
«Bizim belli bir sistemamız bar, oña köre zıncır – halqnı teşkil etken unsurlar. Beş unsur mevcut – tış alemge yanaşuv, maneviy, iç alemge yanaşuv, tibbiyet, til ve medeniyet. Bu unsurlardan birini alıp taşlasaq, halq ğayıp ola. Al-azırda unsurlarımız yoq ola, ve bizim vazifemiz – bu zıncırnı er bir usulnı qullanıp saqlap qalmaqtır», – dep qayd etti Skibin.
Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.
