Hersonda, qırımtatar halqı sürgünliginiñ 71 yıllığına bağışlanğan tedbirler çerçivesinde qırımtatarlarnıñ facialı taqdirini añlatqan «Haytarma» bediiy filmi kösterilecek. Bunı «Küreş» qırımtatar medeniy-sport merkezi Qırım.Aqiqatqa bildirdi.
Teşkilâtçılarnıñ malümatına köre, filmni mayıs 17-de saat 18-de «Yubileynıy» teatrinde kösterecekler.
Kiriş serbest.
Film qırımtatar halqınıñ tarihında facialı olğan 1944 senesi mayıs 18 künü qırımtatarlarnıñ sürgünligini añlata. Film süjetiniñ merkezinde – uçucı, Sovetler Birliginiñ eki defa qaramanı Amet-Han Sultan. 44 senesi mayıs ayında Aqyar azat etilgen soñ Amet-Han tuvğan Alupkağa kete. Onıñ közleri ögünde mayıs 18-de qırımtatarlarnı sürgün eteler.
Mayıs 15-22 künleri «Küreş» qırımtatarlarnıñ facialı taqdiri aqqnda vesiqalı filmlerni Hersonnıñ oquv yurtlarında kösterecek.
Malüm olğanı kibi, Hersonda hatıra bağçasınıñ temelini qoymağa ve 71 terekni oturtmağa da planlaştırıla. Mayıs 18-de matem mitingi keçirilecektir.
Aqmescitniñ Rusiye şeer memuriyeti Qırımtatar Milliy Meclisine sürgünlik yıllığına bağışlanğan matem mitingini keçirmege resmiy şekilde yasaq etti.
Aynı vaqıtta Meclis işğalci akimiyet tarafından provokatsion mitinglerniñ ötkerilecegini red etmey.
Qırım işğalinden evel sürgünlik yıllığında Aqmescitte Bütünqırım matem mitingi keçirile edi, tedbirde onlarnen biñ insan iştirak ete edi.
Qırım akimiyeti sürgünlik qurbanlarınıñ hatıra kününiñ «yañı formatını» belgiledi.
Kiyevde qırımtatar halqı sürgünliginiñ qurbanlarını añma tedbirleri mayıs 14-te başlaycaq. Ukrainanıñ diger şeerleri, Varşava, Berlinde ve Türkiyede de qırımtatarlarğa qoltutv aktsiyaları keçirilecektir.
