Ukraina nazirler şurası Qırımtatar Milliy Meclisiniñ reis muavini Aslan Ömer Qırımlını Ukrainanıñ Qırım Muhtar Cumhuriyeti ve Aqyar şeeriniñ işleri boyunca Devlet hızmetiniñ reisi vazifesine tayinledi.
Ukraina ükümetiniñ resmiy saytı bildire ki, bunıñnen bağlı qararnı Ukraina baş naziri Arseniy Yatsenük imzaladı.
38 yaşında Aslan Ömer Qırımlı 2013 senesi noyabr ayından itibaren Meclis prezidiumınıñ azası, Meclis reisiniñ muavini, tışqı iqtisadiyat alâqaları, yatırım ve milliy iqtisadiyat inkişafı bölüginiñ reberi ola.
Ömer Qırımlı Nazirler şurası yanındaki Qırım ve Aqyar işleri boyunca departamentniñ yolbaşçısı ola. Departament Qırımnıñ işğalden azat etilmesi ve andan köçip kelgenlerniñ meselelerinen oğraşa.
Bundan evel Ukraina halq deputatı, «Qırım» fraktsiyalarara gruppasınıñ reberi Aleksey Gonçarenko Ömer Qırımlınıñ mezkür vazifege tayin etilmesi aqqında bildirgen edi.
