Link açıqlığı

Aqmescitniñ Kiyev rayon mahkemesi mayıs 15-te Qırımtatar Milliy Meclisi reisiniñ muavini Ahtem Çiygoznıñ apis müddetini arttırdı, dep haber ete Qırım.Aqiqat mühbiri.

Apiske alınğannıñ adliyecileri Çiygoznı SİZOdan ev apsine ve Rusiye uquq qorçalayıcısı, Rusiye Federatsiyasınıñ prezidenti yanındaki vatandaş cemiyeti ve insan aqları şurasınıñ azası Andrey Yurovnıñ kefili ile azat etmege rica ettiler.

Mahkeme teneffüsni ilân etip, adliyecilerniñ muracaatını red etti ve apis cezasını iyül 29 kününe qadar uzattı.

Mahkemede bulunğan Meclis reisiniñ muavini İlmi Ümerovnıñ bildirgenine köre, mahkemeci taqiqat devam etkenini, Ahtem Çiygoz ise saqlana bilecegini qayd etti.

«Çiygoz Qırımnı terk etmeycek, onıñ ailesi, tuvğanları mında, özü de mında yaşay, amma mahkemeci buña qulaq asmadı», – dep ayttı Ümerov.

Çiygoznıñ tuvğanları ve soy-sopları qasevetleneler, ömür arqadaşı mahkemeden ağlap çıqtı.

Ahtem Çiygoz Qırımda «fevral 26 işi» boyunca yaqalandı.

Çiygoznı 2015 senesi yanvar ayında 2014 senesi fevral 26 künü «kütleviy çatışmalarnıñ teşkil etilmesi ve iştirak etmesinde» şeklep, taqiqat çerçivesinde yaqaladılar.

2014 senesi fevral 26-da Qırım parlamenti yanında Qırımtatar Milliy Meclis ve «Rus birligi» tarafdarları ile kütleviy miting keçti. Numayışnıñ teşkilâtçıları Meclis reisi Refat Çubarov ve «Rus birligi» lideri Sergey Aksenov oldılar. Çatışmalar neticesinde eki insan elâk oldı. Rusiye Taqiqat komiteti cinaiy işni açtı.

XS
SM
MD
LG