Mayıs 18-de Hersonda qırımtatar halqı sürgünliginiñ qurbanları hatırasına matem mitingi keçirilecek.
Bunı «Küreş» qırımtatar medeniy-sport merkezi Qırım.Aqiqatqa bildirdi.
Mitingde sürgünlik iştirakçileri, siyasiy firqalar ve cemaat teşkilâtlarınıñ vekilleri çıqışta bulunacaqlar.
Teşkilâtçılarnıñ ytqanına köre, tedbir Tiraspolskaya soqağında totalitar rejimler qurbanlarınıñ abidesi yanında saat 17-de başlaycaq.
Saat 18-de aynı yerde ukrain ve qırımtatar halqlarınıñ sovetler deviriniñ totalitar rejimi ile küreşine bağışlanğan bediiy ve talebe eserleriniñ yarış ğalipleri aydınlatılacaq.
Hersonda hatıra bağçasınıñ temelini qoymağa ve 71 terekni oturtmağa da planlaştırıla.
Aqmescitniñ Rusiye şeer memuriyeti Qırımtatar Milliy Meclisine sürgünlik yıllığına bağışlanğan matem mitingini keçirmege resmiy şekilde yasaq etti.
Aynı vaqıtta Meclis işğalci akimiyet tarafından provokatsion mitinglerniñ ötkerilecegini red etmey.
Qırım işğalinden evel sürgünlik yıllığında Aqmescitte Bütünqırım matem mitingi keçirile edi, tedbirde onlarnen biñ insan iştirak ete edi.
Qırım akimiyeti sürgünlik qurbanlarınıñ hatıra kününiñ «yañı formatını» belgiledi.
Kiyevde qırımtatar halqı sürgünliginiñ qurbanlarını añma tedbirleri mayıs 14-te başlaycaq. Varşava ve Berlinde de qırımtatarlarğa qoltutv aktsiyaları keçirilecektir.
