Link açıqlığı

Mayıs 18-de qırımtatar halqı sürgünliginiñ yıllığında saat 11-den saat 13-ke qadar Twitter qullanıcıları qırımtatarlarğa qoltutuv birdemlik aktsiyasına qoşula bilecekler. İşbu aktsiyanıñ teşebbüsçileri OO «Tsentr UA», Krım SOS teşkilâtı ve «ÇESTNO» Cemaat areketi oldılar, dep haber ete Qırım.Aqiqat.

«Bizler er kesni aktsiyamızğa qoşulıp, qırımtatarlarğa qoltutuv tweetini yollamağa çağıramız», – dep aytıla teşkilâtçılarnıñ beyanatında.

Qullanıcılarğa Twitter saifesini qullanıp, #SaveCrimeanTatars # QirimSurgunu hashtagleri ile mesac yazmağa teklif etile.

Teşkilâtçılarnıñ fikirince, yarımada işğal etilgen soñ yarımadada qırımtatar halqınıñ temsilcilerine basqı yapmağa, faal ve jurnalistlerni taqip etmege başladılar, bir sıra qırımtatar matbuat vastası qapatıldı.

«Bu sene işğal akimiyet daa beterini yaptı ve barışıq toplaşuvlar aqqını sıñırlap, Aqmescitte keçirilecek olğan qırımtatar sürgünligi yıllığına bağışlanğan aktsiyanı yasaq etti. Bu vaziyette Ukraina vatandaşları bunıñ kibi şaraitlerde qalğan semetdeşlerine qoltutmaq kerekler», – dep qayd eteler aktsiyanıñ teşkilâtçıları.

Aqmescitniñ Rusiye şeer memuriyeti Qırımtatar Milliy Meclisine sürgünlik yıllığına bağışlanğan matem mitingini keçirmege resmiy şekilde yasaq etti.

Aynı vaqıtta Meclis işğalci akimiyet tarafından provokatsion mitinglerniñ ötkerilecegini red etmey.

Qırım işğalinden evel sürgünlik yıllığında Aqmescitte Bütünqırım matem mitingi keçirile edi, tedbirde onlarnen biñ insan iştirak ete edi.

Qırım akimiyeti sürgünlik qurbanlarınıñ hatıra kününiñ «yañı formatını» belgiledi.

XS
SM
MD
LG