Dnepropetrovsk şeerinde «Qırımtatar cemiyetiniñ» temsilciligini açtılar. Resmiy açılış tedbirine köçip kelgenler, yerli akimiyet ve halqara teşkilâtlarnıñ vekilleri keldiler.
İşbu merkezniñ reberi Kemal Mustafayevniñ aytqanına köre, Dnepropetrovsktaki cemiyet bölügi Qırımdan köçip kelgenlerge yerli şaraitlerge alışmağa yardım etecek.
Kemal Mustafayevniñ qayd etkenine köre, evlerini terk etip, qıtaiy Ukrainağa vaqtınca ya da bütünley köçip kelgen qırımtatarlar yerli cemaatqa qoşulmalı ve Ukrainanıñ inkişafında iştirak etmeli.
Cemiyet temsilciliginde semetdeşlerine aq-uquqlarını qorumağa, em de qırımtatar halqınıñ medeniyetini saqlap qalmağa tırışalar.
Merkezde qırımtatarca, ukraince, türkçe ve diger til dersleri bedava keçirilecek. Mında Qırım tarihı, qırımtatar halqınıñ medeniyetini ögrenecekler.
Bundan ğayrı, cemiyetniñ vekilleri şeerniñ medeniy ve cemaat ayatında faal iştirak etip, öz tedbirlerini, şu cümleden mayıs 18 sürgünlik qurbanlarını añma tedbirini keçirmege teşebbüs köstermege ve keçirmege planlaştıralar.
Al-azırda «Qırımtatar cemiyeti» Lviv ve Hersonda çalışa. Tezden Vinnitsa, Geniçesk, Melitopolde açılacaq.
Migratsion hızmetiniñ malümatına köre, al-azırda Dnepropetrovsk vilâyetinde Qırımdan köçip kelgen 100 adam qayd etildi. «Qırımtatar cemiyeti» – Ukrainada yaşağan qırımtatarlarnıñ menfaatlarını temsil etken cemaat teşkilâtıdır.
