Qırım prokuraturası cumaaqşamı künü, mayıs 14-te, Qırımtatar Milliy Meclisine mayıs 18 sürgünlik kününde bir de bir aktsiyalarnı keçirmek yasaq olğanını hatırlattı. Bu aqqında Qırımtatar Milliy Meclisi reisiniñ birinci muavini Nariman Celâl Facebook saifesinde bildirdi, – dep haber ete Qırım.Aqiqat.
«Qırım Cumhuriyeti prokuraturasınıñ federal havfsızlıq, milletlerara munasebetler, ekstremizm ve terorizm ile küreş qanunlarınıñ yerini ketirilmesini nezaret etken bölük prokurorı Valentin Çupkin bugün maña mayıs 18-de qırımtatar sürgünliginiñ qurbanlarını añma künü munasebetinen yapılacaq tedbirler meselesinde Qırım prokurorı Natalya Poklonskaya tarafından imzalanğan tenbini oqudı», – dedi o.
Nariman Celâlnıñ aytqanına köre, Meclis Qırımda qırımtatar sürgünligi künü keçirilecek bir de bir tedbirniñ teşkilâtçısı olmasa da, vesiqada ne sebepten Meclis tenbiyelengenini añlatalar.
«Vesiqada keçken sene mayıs ayında Meclis liderleri Refat Çubarov ve Ahtem Çiygoznıñ qırımtatarlarğa qanunsız ve ekstremistik areketlerde (isbat olaraq 2014 senesi mayıs 3 vaqialar örnek kösterile) iştirak etmek çağıruvları neticesinde bir çoq qırımtatarı cezalandırılğanı aytıla. Keçken künlerden berli Qırımtatar Milliy Meclisi reisiniñ birinci muavini olğanımdan sebep Qırım prokuraturası meni liderlerimizniñ yapqan «hatasını» tekrarlamamaq meselesinde tenbiyeledi», – dep añlattı Nariman Celâl.
Onıñ aytqanına köre, prokuror Qırımnıñ Rusiye akimiyeti hatıra tedbirlerini keçirmek qararını alğanını bildirip, Milletlerara munasebetler devlet komitetinen beraber olarnı teşkil etmege ve keçirmege çağırdı.
«Bir temsil organı olaraq Qırımtatar Milliy Meclisi işbu tedbirlerni teşkil etmey ve keçirmey, bu sebepten tedbirler içün mesüliyet resmiy teşkilâtçılar üzerinde qala. Ne men, ne de Qırımtatar Milliy Meclisi bir de bir qanunsız kütleviy numayışnı keçirmeycegimizni bildirdim», – dep qayd etti Meclis reisiniñ birinci muavini.
Malüm olğanı kibi, Aqmescitniñ Rusiye şeer memuriyeti Qırımtatar Milliy Meclisine sürgünlik yıllığına bağışlanğan matem mitingini keçirmege resmiy şekilde yasaq etti.
Aynı vaqıtta Meclis işğalci akimiyet tarafından provokatsion mitinglerniñ ötkerilecegini red etmey.
Qırım işğalinden evel sürgünlik yıllığında Aqmescitte Bütünqırım matem mitingi keçirile edi, tedbirde onlarnen biñ insan iştirak ete edi.
Qırım akimiyeti sürgünlik qurbanlarınıñ hatıra kününiñ «yañı formatını» belgiledi.
Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.
