Link açıqlığı

Türkiyeniñ Antalya şeerinde qırımtatar sürgünliginiñ qurbanlarına bağışlanğan «Qırımğa ümüt ol» yürüşi olıp keçti, dep haber ete QHA.

Aktsiya iştirakçileri Kazım Özalp Caddesinde banklardan biriniñ yanında toplaşıp, Türkiye, Qırım ve Uygurstan bayraqları ile Cumhuriyet meydanına kettiler. Bu kün Türkiyede analar künü qayd etilgeninden sebep yürüş iştirakçileri yanından keçken qadınlarğa çeçek berdiler, dep haber ete neşir.

Cumhuriyet meydanında sürgünlikte elâk olğanlarnı añdılar.

«Qırımtatarlar öz küreşinde er daim demokratik usullarnı qullandılar. Qırımda 12 fayız olğan qardaşlarımıznıñ keçmişte körgen qara künleri kene başladı», – dep ayttı Antalya qırımtatarları platformasınıñ matbuat kâtibi Saadet Assan.

Agentlik bildire ki, aynı adnı taşığan miting mayıs 17-de Ankarada keçirilecek.

Qırımtatar halqı sürgünliginiñ 71 yıllığı munasebetinen Kiyev ve Lvivde bir sıra tedbir ötkerilecektir.

Malüm olğanı kibi, Aqmescitniñ Rusiye şeer memuriyeti Qırımtatar Milliy Meclisine sürgünlik yıllığına bağışlanğan matem mitingini keçirmege resmiy şekilde yasaq etti.

Aynı vaqıtta Meclis işğalci akimiyet tarafından provokatsion mitinglerniñ ötkerilecegini red etmey.

Qırım işğalinden evel sürgünlik yıllığında Aqmescitte Bütünqırım matem mitingi keçirile edi, tedbirde onlarnen biñ insan iştirak ete edi.

Qırım akimiyeti sürgünlik qurbanlarınıñ hatıra kününiñ «yañı formatını» belgiledi.

Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.

XS
SM
MD
LG