Link açıqlığı

Lvivde qırımtatarlarnıñ sürgünligi yıllığına çıraqlarnı yaqacaqlar ve «Haytarmanı» bedava kösterecekler


Qırımtatar halqı sürgünliginiñ 71 yıllığı munasebetinen Lvivde mayıs 17-18 künleri bir sıra tedbir keçirilecek. Böylece, şeerde fotosergisi, film numayışı ve matem mitinginiñ keçirilmesi beklenile.

Bunı Lvivdeki tedbirlerni teşkil etkenlerden biri olğan «Krım SOS» teşkilâtı Qırım.Aqiqatqa bildirdi.

«Mayıs 18-de dünyada Qırımnıñ tamır halqınıñ aman-aman yarısını öldürgen Stalinniñ qırımtatar sürgünliginiñ 71 yıllığını añalar. Qırımdaki soñki adiseler, Rusiyeniñ yarımada işğali, qırımtatarlarnıñ taqdirini tekrar telükege attı. Aman-aman eki biñ qırımtatarı Lvivde yerleşti», – dep qayd etti teşkilât.

Mayıs 17-de Lvivniñ Prigorodnıy vokzalında («Sunduk» alış-veriş merkeziniñ qarşısı) saat 14-ten 15-ke qadar ressam Rustem Eminovnıñ fotosergisi açılacaq.

Aynı kün saat 17-den saat 18:30-ğa qadar yerli Din tarihı müzeyinde «Qırımtatarlarnıñ sürgünligi – kelecek nesillerniñ taqdirine tesiri. Oşama, medeniyet, siyaset» adlı mini lektsiyalar keçirilecek. «Sürgünlik» şiir muzıka improvizatsiyası keçirilecek.

Saat 20-den 22-ge qadar Svoboda caddesinde «Yüreginde ateş yaq» aktsiyasınıñ keçirilmesi planlaştırıla. Çıraqlardan Qırım yarımadası, «71» raqamı, ukrain ve qırımtatar timsalleri – «Tamğa» ve «Trızub» yapılacaq.

Mayıs 18-de Lvivniñ «Kopernik» kinoteatrinde saat 15:40-tan saat 17:20-ge qadar teşkilâtçılar qırımtatarlarnıñ sürgünligi aqqında «Haytarma» bediiy filmini köstermege planlaştıralar, saat 19-dan 20-ge qadar Svoboda caddesinde matem mitingi keçirilecek.

Qırımtatar sürgünliginiñ yıllığına bağışlanğan bir sıra tedbir Kiyevde de keçirilecek.

Aqmescitniñ Rusiye şeer memuriyeti Qırımtatar Milliy Meclisine sürgünlik yıllığına bağışlanğan matem mitingini keçirmege resmiy şekilde yasaq etti.

Aynı vaqıtta Meclis işğalci akimiyet tarafından provokatsion mitinglerniñ ötkerilecegini red etmey.

Qırım işğalinden evel sürgünlik yıllığında Aqmescitte Bütünqırım matem mitingi keçirile edi, tedbirde onlarnen biñ insan iştirak ete edi.

Qırım akimiyeti sürgünlik qurbanlarınıñ hatıra kününiñ «yañı formatını» belgiledi.

XS
SM
MD
LG