Link açıqlığı

Meclis: eki biñ qırımtatarı Rusiye Taqiqat komitetinden Çiygoznıñ cezasını deñiştirmege rica ete


Qırımtatar Milliy Meclisi reisiniñ birinci muavini Nariman Celâl bildire ki, Ahtem Çiygoz apiske alınğan soñ aman-aman eki biñ semetdeşi Rusiye Taqiqat komitetine resmiy şekilde muracaatta bulunıp, Çiygoznıñ cezasını deñiştirmege rica etti.

Bunı Celâl Facebook saifesinde yazdı.

«Çiygoz A.Z. özüni müsbet tarafından kösterdi, itibarlı bir insan, qoranta saibi, kiçik balanı baqa, memuriy ve cinaiy mesüliyetke çekilmegen edi, yaşağan yerinde müsbet tarafından tanıla», – dep tekrarlay qırımtatarlarnıñ muracaatını Celâl ve Çiygozdan minnetdarlığını bildire.

Qırımtatar Milliy Meclisi reisiniñ muavini Ahtem Çiygoznı Rusiye uquq qorçalayıcısı, Rusiye Federatsiyasınıñ prezidenti yanındaki vatandaş cemiyetiniñ inkişafı ve insan aqları boyunca Şurasınıñ azası Andrey Yurovnıñ şahsiy kefaleti ile azat etmediler.

Qırım Cumhuriyetinde Rusiye Taqiqat komitetiniñ Baş taqiqat idaresi ve Aqmescitniñ Kiyev rayon mahkemesine Ukraina ve Tataristan Cumhuriyetinde nam qazanğan sanat erbabı, «Qırım» ansambliniñ bediiy reberi Server Kakura, em de «Qırım» gazetasınıñ baş muarriri, filologiya ilimleri namzeti, Qırım müendislik pedagogika universitetiniñ qırımtatar ve türk filologiyası fakultetiniñ dekan vazifelerini eda etken Bekir Mamutovnıñ Ahtem Çiygoz içün kefil olmaq arizaları berildi.

Olarnıñ mektüplerine cevaplar kelmedi, dep bildireler Mecliste.

Mayıs 15-te saat 11:00 Aqmescitniñ Kiyev rayon mahkemesinde taqiqatçınıñ keçken sene fevral 26-da «kütleviy numayışlarnı teşkil etmesinde» qabaatlanğan Qırımtatar Milliy Meclisi reisiniñ muavini Ahtem Çiygoznıñ apis cezasını arttırmaq muracaatı baqılacaq.

Qırım parlamenti yanında Qırımtatar Milliy Meclis ve «Rus birligi» tarafdarları ile kütleviy miting keçti. Numayışnıñ teşkilâtçıları Meclis reisi Refat Çubarov ve «Rus birligi» lideri Sergey Aksenov oldılar. Çatışmalar neticesinde eki insan elâk oldı. Rusiye Taqiqat komiteti cinaiy işni açtı. Onıñ taqiqatı çerçivesinde «kütleviy numayışlarnı teşkil etüv ve iştirak etüv boyunca» aqımdaki seneniñ yanvar 29-da Meclis reisiniñ muavini Ahtem Çiygoz yaqalandı. Rusiye Taqiqat komiteti Meclis reis muavini Ahtem Çiygoznğa 2015 senesi fevral 19-na qadar, soñra mayıs 19-na qadar apis müddetini belgiledi.

XS
SM
MD
LG