Link açıqlığı

Qırımda mayıs 18-de devlet müessiseleri bayraqlarnı endirecekler


Qırımda mayıs 18 künü sürgünlik qurbanlarınıñ hatıra künü Qırımnıñ bütün devlet müessiselerinde bayraqlar endirilecek. Bunı Qırım devlet şurasınıñ milletlerara munasebetler komitetiniñ toplaşuvında onıñ reisi Edip Gafarov bildirdi, – dep haber ete çarşenbe künü, mayıs 13-te, Qırım ükümetiniñ «ruporı» Krıminform saytı.

«Keçken sene olğanı kibi, añlaşılmamazlıqlar olmasın – bazı binalarda bayraqlar asılğan edi», – dep qayd etti o. Onıñ aytqanına köre, Sergey Aksenovnıñ hatıra künü tedbirleri aqqında buyruğında bunıñ aqqında aytılmağanından sebep bütün regionlarğa telefonogramma vastasınen haber etilmeli.

Deputat Lentun Bezaziyev hatırlattı ki, 1993 senesi Qırım Muhtar Cumhuriyetiniñ Yuqarı Şurası mayıs 18-ni Sürgünlik qurbanlarınıñ hatıra künü olaraq belgilegen qararnı qabul etip, devlet binalarında bayraqnıñ endirilmesini mecburiy olaraq qayd etti.

Sergey Aksenovnıñ buyruğına binaen, Sürgünlik qurbanlarınıñ hatıra künü munasebetinen keçirilgen tedbirler mayıs 17-de saat 20-de Aqmescitniñ Lenin meydanında «Yüreginde ateş aç» aktsiyası ile başlanacaq.

Malüm olğanı kibi, Qırım akimiyeti sürgünlik qurbanlarınıñ hatıra kününiñ «yañı formatını» belgiledi.

Aqmescitniñ Rusiye şeer memuriyeti Qırımtatar Milliy Meclisine sürgünlik yıllığına bağışlanğan matem mitingini keçirmege resmiy şekilde yasaq etti.

Aynı vaqıtta Meclis işğalci akimiyet tarafından provokatsion mitinglerniñ ötkerilecegini red etmey.

Qırım işğalinden evel sürgünlik yıllığında Aqmescitte Bütünqırım matem mitingi keçirile edi, tedbirde onlarnen biñ insan iştirak ete edi.

XS
SM
MD
LG