Qırımtatar milliy areketiniñ faali, Qurultay Merkeziy saylav komissiyasınıñ reisi Zair Smedlâyevniñ fikirince, Qırımnıñ şimdiki akimiyeti halqtan, eñ çoq ise qırımtatarlardan qorqa.
O, Qırımnıñ Rusiye akimiyetiniñ qırımtatar halqı sürgünliginiñ yıllığına bağışlanğan matem tedbirlerini yañı formatta keçirmek qararını izaatladı.
«Halq içün canını feda etmege söz berip akimiyetke ketkenler al-azırda halq ölsin dep, er şeyni yapalar», – dep yazdı o Facebookta.
«Qırımtatar faallerini apiske almağa devam eteler. Adamlarnı qaçırğan ve öldürgenler cezalanmadı. Şimdiki akimiyet halqtan, eñ çoq ise qırımtatarlardan qorqa, bu sebepten de bizge kütleviy tedbirlerni keçirmege izin bermeyler. Matem tedbirlerini yañı formatta keçirmek cevabı Aksenovnıñ laflarında bar (Qırım yolbaşçısı – muar.), o, olarnı qırımtatar halqı keçirgende büyük qorqu aqqında tarif ete. Hatıra tedbirlerimiz vaqtında iştirakçilerinden iç biri bir de bir millet temsilcisine qarşı basqı yapmasa da, bu qorqu bugün Qırımnı idare etkenlerge keçti», – dedi Smedlâyev.
Onıñ fikirince, «yañı formatnıñ» sebebi akimiyet vekilleriniñ matem mitingine bir çoq qırımtatarını çıqaracağından emin olmağanınen bağlı.
Qırımda Rusiye akimiyeti mayıs 18 künü Sürgünlik qurbanlarınıñ hatırasına bir sıra tedbirni keçirecek ola.
Qırımnıñ Rusiye Devlet şurasınıñ reis muavini Remzi İlyasov dedi ki, bu sene mayıs 18 künü «Hatıra ve qaar-qasevet kününiñ asıl formatını alacaq».
Qırımnıñ Rusiye yolbaşçısı Sergey Aksenov qayd etti ki, «tedbirler yüksek seviyede keçirilsin dep», bunıñnen bağlı buyruqnı imzalaycaq.
