Bu gece Odessadaki Malovskiy soqağında demir yol köprüsinde patlav yüz berdi. Elâk olğan ve zarar körgenler yoq.
İçki işler nazirliginiñ idaresi bergen malümatına köre, Odessa demir yolunda patlav tam yolda yüz berdi, onıñ neticesinde 1 metr terenligi ve diametri ile çuqur peyda oldı. Uquq qoruyıcılar vaqianı ögreneler.
Patlağan köpürge birinci olaraq «Pravıy sektor» faalleri keldi. Olar şeerdeki nizamnı muntazam sürette nezaret eteler. Bunı teşkilâtnıñ matbuat kâtibi Varvara Çernoivanenko bildirdi. Onıñ aytqanına köre, patlav trenden bir qaç daqqa ögüne yüz berdi. Maşinistke telüke aqqında bildirmege yetiştirdiler.
Mayıs 12-de Odessa patlav tehnikacıları daa bir patlavnıñ ögüni aldılar. Odessa vilâyetinde İçki işler nazirliginiñ idaresi bildire ki, şeerniñ sanayı rayonında bir zavodnıñ yanında işçiler gaz magistralini tamir etip, belgisiz şeyni taptılar. Bu elde yapılğan patlav maddesi oldı. Onı ekspertizağa yolladılar.
Mayıs 2-den 10-ğa qadar Odessa uquq qoruyıcıları faal çalıştılar. Ukrainanıñ farqlı regionlarından biñden ziyade Odessağa kelip, bu müddet devamında nizamnı nezaret ettiler. Böyle tedbirler mayıs 2 adiseleriniñ yıllığı ve Ğalebe künü sebebinden yapıldı. Bu künler Odessada raat keçti.
