Mayıs 15-ten itibaren Aqyarda şeer tışına çıqqan avtobus biletlerini pasport boyunca satacaqlar.
Bu aqqında Qırımnıñ Rusiye ükümeti saytında aytıla.
Hızmet Rusiyeniñ «Naqliyat havfsızlığı aqqında» Federal qanunınıñ amelge keçirilmesi aqqında bildire.
«Aqyar federal şeeriniñ tışına çıqqan avtobus biletleri şahsiyetni bildirgen vesiqalar (pasport, doğuv şeadetnamesi) boyunca satılacaq», – dep aytıla haberde.
Şeerlerara avtobuslarnıñ biletleri Merkeziy avtovokzal ve üç avtostantsiyada satıla: «İnkerman», «Zaharova» ve «Kaça».
Keçken sene baarde yarımada işğalinden soñ Qırım ve Aqyar Rusiye qanunlarına keçtiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
