Link açıqlığı

Cumaaqşamı künü, mayıs 14-te, Dnepropetrovskta «Qırımtatar cemiyetiniñ» temsilciligini açmağa planlaştıralar.

Bunı «Qırımtatar cemiyetiniñ» Dnepropetrovsk bölüginiñ matbuat hızmeti Qırım.Aqiqatqa bildirdi.

İlânğa köre, temsilcilikniñ resmiy açılışına qırımtatarlarnıñ liderleri, yerli akimiyet vekilleri, halqara teşkilâtlar, Dnepropetrovsknıñ cemaat teşkilâtları davet etildi.

Matbuat hızmetiniñ malümatına köre, tedbirde teşkilât taqdim etilecek, em de Dnepropetrovsktaki Cemiyet bölüginiñ planları ve yeñişleri aqqında tarif etilecek.

«Evlerini terk etip, qıtaiy Ukrainağa vaqtınca ya da bütünley köçip kelgen qırımtatarlarnıñ yerli cemiyetler ile bağ qurması ve Ukraina inkişafında faal iştirak etmesi bizim içün pek müim. Aynı bu sebepten Dnepropetrovsk vilâyetinde yaşağan qırımtatarlar Ukrainanıñ grajdanlıq cemiyetiniñ ayırılmaz parçası olmağa ve semetdeşlerine aqqlarını qorumağa yardım etmege, bunıñnen beraber – qırımtatar halqınıñ zengin medeniyetini saqlap qalmaq ve köstermek ve Dnepropetrovsk vilâyeti cemiyetleriniñ medeniy ayatını zenginleştirmektirmege tırışalar», – dep qayd eteler Dnepropetrovsk cemiyetiniñ bölüginde.

Temsilcilikniñ resmiy açılışı Dnepropetrovskta Çernışevskiy, 47a adresi boyunca saat 11-den saat 13-ke qadar keçirilecek.

«Qırımtatar cemiyeti» hayriye teşkilâtı – Ukrainada yaşağan qırımtatarlarnıñ menfaatlarını temsil etken cemaat teşkilâtı. «Qırımtatar cemiyeti» tarihiy vatanından tış yaşağan qırımtatarlarnıñ maneviy, medeniy ve içtimaiy mirasına qoltutıp, olarnıñ icadiy zenginleşmesine yardım ete. Cemiyet Ukraina devletiniñ farqlı medeniyetleri ve dinleri arasında barışıq, tolerantlıq ve bir-birine sayğı kösterilmesine yönelgen teşebbüslerge qoltuta.

XS
SM
MD
LG