Qırım camilerinde mayıs 18-de, Qırımtatar halqı sürgünliginiñ 71 yıllığında, saat 11-de sürgünlik qurbanlarını dua ile añacaqlar, dep haber ete Qırım.Aqiqat.
Qırım ve Aqyar musulmanları Diniy idaresi ve Qırımnıñ müftisi acı Emirali Ablayev dindaşlarını duağa qoşulmağa çağırdılar.
«Ölgenlerni añmaq er bir musulmannıñ boyun borcudır», – dep yazdılar müftiyatta.
Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.
Qırım.Aqiqat saytı bildire ki, Aqmescitniñ Rusiye şeer memuriyeti Qırımtatar Milliy Meclisine sürgünlik yıllığına bağışlanğan matem mitingini keçirmege resmiy şekilde yasaq etti.
Aynı vaqıtta Meclis işğalci akimiyet tarafından provokatsion mitinglerniñ ötkerilecegini red etmey.
Qırım işğalinden evel sürgünlik yıllığında Aqmescitte Bütünqırım matem mitingi keçirile edi, tedbirde onlarnen biñ insan iştirak ete edi.
Kiyevde qırımtatar halqı sürgünliginiñ qurbanları hatırasına bağışlanğan tedbirler mayıs 14-te başlanacaq. Qırımtatarlarğa qoltutuv aktsiyaları Varşava ve Berlinde de keçirilecek.
