Cumaaqşamı künü, mayıs 14-te, Kiyevde «Qırım işğali – cinayet yıllığı» adlı muzakere keçirilecektir. Tedbir T.G.Şevçenko adına Kiyev milliy universitetinde ötkerilecek.
Bunı tedbir teşkilâtçılarından biri olğan KrımSOS cemaat teşebbüsi Qırım.Aqiqatqa bildirdi.
İlânğa binaen, muzakerede qırımtatarlarnıñ milliy lideri Mustafa Cemilev, Qırımtatar halqınıñ aq-uquqlarını qorçalav komitetiniñ koordinatorlarından biri Sinaver Kadırov ve KrımSOS tesisçilerinden biri Tamila Taşeva iştirak etecekler. Teşkilâtçılarnıñ malümatına köre, diger memleketlerniñ diplomatik vekilleri de qoşula bile.
«Tedbirniñ esas vazifesi – cemaatnıñ diqqatını Qırım meselesine celp etmek, tarihiy faktnıñ müimligini yetkizmek, gençlerni dialogğa çağırmaqtır», – dep aytalar muzakereniñ teşkilâtçıları.
Tedbirde Qırımnıñ Rusiyege sahte qoşulmasınıñ cinayet olaraq tasnif etilmesi, yarımadada şimdiki esnaslar, em de qırımtatar sürgünliginiñ yıllığı qonuşulacaq.
Tedbir saat 11-ge planlaştırıla.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
