Sibirdeki orman yanğınlarınıñ sayısı mayıs bayramlarından soñ on qat arttı.
Salı künü saba Zabaykalyede 26 orman yanğını eki biñ gektarnı qaplap aldı. Soñki üç kün devamında yanğınlarnıñ sayısı ülkede 35 qat arttı.
Burâtiya orman hocalığınıñ malümatına köre, orman yanğınlarınıñ meydanı 11 qat arttı: 60-tan 689 gektarğa qadar. Alev cumhuriyetniñ 15 rayonında qayd etildi. Aprel ortasından itibaren fevqulâde vaziyet rejimi olğan Burâtiyada orman yanğınlarınıñ qurbanı eki kişi oldı, daa doquz insan yaralandı.
Yanğınlarnıñ esas sebeplerinden biri – ateşke diqqatsız yanaşması, dep qayd etile haberde.
Yanğın ile küreş içün aviatsiya, mahsus tehnika ve yanğıncılar celp etildi.
Salı künü saba berilgen malümatqa köre, Sibirde tahminen altı biñ gektarda 89 orman yanğını qayd etildi, dep bildire Sibir federal bölgesiniñ orman hocalığı departamenti.
Onıñ malümatına köre, yanğınlar Zabaykalye ve Krasnoyarsk ülkelerinde, Altay, Burâtiya ve Tıva cumhuriyetlerinde, em de İrkutsk vilâyetinde yüz berdi.
Aprel ayında Sibirde yüz bergen tabiat yanğınlarınıñ qurbanı 34 kişi oldı, yedi buçuq biñ kişi zarar kördi.
