Link açıqlığı

Qırımtatar halqı sürgünliginiñ qurbanları hatırasına bağışlanğan esas tedbirler Kiyevde mayıs 14-te başlanacaq. Bu kün Mustaqillik Meydanında Glavpoçtamt kirişinde qırımtatar halqına bağışlanğan mektüp pullarını taqdim etecekler. Tedbirni er kes ziyaret ete bile.

Bunı Qırımtatar Milliy Meclisiniñ reisi Refat Çubarov Facebook saifesinde bildirdi.

Tedbirler planına binaen, mayıs 15-te Lavrskaya, 19 adresi boyunca «Müzey İvana Gonçara» Ukrain halq medeniyeti merkezinde «Zıncır: hatıra alqaları. Qırımtatar halqınıñ genotsidi qurbanlarınıñ hatırası ve qaar-qaseveti» sergisini açacaqlar.

«Müzeyniñ büyük zalında ziyaretçiler qırımtatar eviniñ odası (sürgünlikten evel olğan oda), milliy qıyafet, ev eşyaları ve resimler ile tanış ola bilecekler. Bunıñnen bağlı video levhaları kösterilecek», – dep aytıla Çubarovnıñ ilânında. Sergi saat 18:00 açılacaqtır.

Mayıs 17-de Vladimirskaya, 2 adresi boyunca Ukrainanıñ milliy tarih müzeyinde üyle vaqtında qırımtatar halqı sürgünliginiñ yıllığına bağışlanğan «Hatıra albomı» sergisiniñ açılışı planlaştırıla. Haberde aytıla ki, sergide aile arhivleriniñ fotoresimleri numayış etilecek. Aynı bu kün saat 20-den saat 22-ge qadar Mustaqillik Meydanında «Yüreginde ateş aç» hatıra aktsiyasınıñ ötkerilmesi planlaştırıla.

«Çıraqlardan Qırım yarımadası ve 71 raqamı, «Tamğa» qırımtatar milliy timsali ve «No genocide» yazısı yapılacaq. Çıraqlar qoyulğanda 1944 senesi mayıs 18 adiseleri ve olarnıñ aqibetlerine bağışlanğan qırımtatar halq yırları icra etilecektir», – dep aytıla beyanatta.

Mayıs 18-de saat 16-da Ukrainanıñ milliy operasında «hatıra aqşamını» keçirmek niyetindeler. Tedbirde Ukraina devlet akimiyeti organlarınıñ reberleri, Qırımtatar Milliy Meclisiniñ azaları, Ukraina halq deputatları, cemaat erbapları ve studentler iştirak etecektir.

Saat 19-da Mustaqillik Meydanında qırımtatar halqı genotsiditsiniñ qurbanları hatırasına bütünukrain matem mitingi ötkerilmeli. Tedbirde Qırımtatar Milliy Meclisiniñ reberleri ve azaları, siyasiy firqalar ve cemaat teşkilâtlarınıñ vekilleri, Ukraina halq deputatları çıqışta bulunacaqtır.

Malüm olğanı kibi, Aqmescitniñ Rusiye şeer memuriyeti Qırımtatar Milliy Meclisine sürgünlik yıllığına bağışlanğan matem mitingini keçirmege resmiy şekilde yasaq etti.

Aynı vaqıtta Meclis işğalci akimiyet tarafından provokatsion mitinglerniñ ötkerilecegini red etmey.

Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.

Qırım işğalinden evel sürgünlik yıllığında Aqmescitte Bütünqırım matem mitingi keçirile edi, tedbirde onlarnen biñ insan iştirak ete edi.

XS
SM
MD
LG