Çarşenbe künü, mayıs 13-te, saat 11-30 Moskva şeer mahkemesinde (Moskva, Bogorodskiy Val soq., 8) Aleksandr Kolçenko içün ceza belgilenmesi boyunca mahkeme ötkerilecek, dep bildire Facebookta Qırım insan aqları alan missiyası.
«2015 senesi mayıs 16-da Kolçenkonıñ apiske alınmasından tam bir yıl toldı. Al-azırda qabaatlanğanlar (Sentsov ve Kolçenko) ve adliyeciler işnen tanış olalar, taqiqat yekünlendi. İşnen tanış olğan soñ onı mahkemege berecekler», – dep bildireler uquq qorçalayıcılar.
Qırımda faşizmge qarşı küreşken içtimaiy faal Aleksandr Kolçenko 2014 senesi mayıs ayında Aqmescitte apiske alınğan edi. Onı Moskvadaki «Lefortovo» SİZOsına yolladılar.
FSB taqiqatçıları onı ve Qırımnıñ daa üç sakinini, şu cümleden ukrain rejissöri Oleg Sentsov, tarihçı Aleksey Çirniy ve adliyeci Gennadiy Afanasyevni terroristik areketler, terakt azırlanması ve silânı qanunsız qullanuvda qabaatlaylar.
Ukrainada Kolçenko ve Sentsovnı siyasiy mabus olaraq tanıp, olarnı azat etmege talap eteler.
