Link açıqlığı

Venada halqara teşkilâtlar yanındaki Ukrainanıñ daimiy temsilciligi Rusiyeni qanunsız alda qaçırılğan ve yaqalanğan Ukraina vatandaşlarını azat etmege çağıra. Bu aqqında Venada halqara teşkilâtlar yanındaki Ukrainanıñ daimiy temsilcisi İgor Prokopçuknıñ mayıs 7-de OSCE Daimiy şurasınıñ toplaşuvında seslendirgen eyyet beyanatında aytıla, dep yaza Radio Svoboda.

«Bizlerni Rusiyeniñ Minsk añlaşmalarına riayet etmege raatsızlay, şu cümleden esir alınğan ve qanunsız alda yaqalanğan şahıslar, ukrain vatandaşları Nadejda Savçenko, Oleg Sentsov, Aleksandr Kolçenko ve Ukrainadan esir alınğan ve qanunsız alda Rusiyede tutulğan diger ukrainlerni azat etmemesi qasevetlendire», – dep aytıla beyanatta.

Ukrain tarafı Rusiyeni Ukrainanıñ konsullıq vekillerine Rusiyede yaqalanğan ukrainler ile körüşmege izin bermege rica etti.

Mayıs 11-de dünyanıñ bir çoq farqlı memleketinde faaller 329 künden berli Rusiyede apiste bulunğan ukrain uçucısı Nadejda Savçenkonıñ doğğan künü munasebetinen tedbirler keçireler.

Tam bir yıl evelsi ukrain rejissöri Oleg Sentsov Qırımda yaqalanğan edi. Keçken sene mayıs 11-de onı Rusiye tarafından işğal etilgen Qırımda yaqalanıp, teraktlarnıñ azırlanmasında qabaatlandı. Onıñ işdeşleri ve uquq qorçalayıcılar rejissörnii azat etmege çağıralar, olar kinoressamnı siyasiy mabus olaraq tanıylar. Sentsovdan ğayrı daa üç kişi işte qayd etile – Aleksandr Kolçenko, Gennadiy Afanasyev i Aleksey Çirniy.

XS
SM
MD
LG