Qırımtatar Milliy Meclisiniñ temsilcileri Qırım akimiyetiniñ Aqmescitte Qırımtatar halqı sürgünliginiñ qurbanları hatırasına matem tedbirlerniñ keçirilmesine izin bermegenini talil eteler. Aynı vaqıtta Meclis işğalci akimiyet tarafından provokatsion mitinglerniñ ötkerilecegini red etmey.
Bunı Qırımtatar Milliy Meclisiniñ reisi Refat Çubarov Kiyevde «Hıdırlez» bayramında jurnalistlerge ayttı, dep haber ete Qırım.Aqiqatnıñ mühbiri.
«Aqmescitte yerli akimiyet bazı satqınlarğa tayanıp, sahte mitingni keçirmesi mümkün. Bizler olarnen beraber bunıñ kibi mitinglerde iştirak etip olamayıq, lâkin qırımtatarlar yaşağan yerlerde matem tedbirleri keçirilecek – camilerde dualar oqunacaq ve çeçekler qoyulacaq. 23 yıl içinde qırımtatarlar yaşağan yerde tiklegenimiz hatıra taşları ve abideleri yanında dualar oqunacaq», – dedi Çubarov.
Qırım.Aqiqat bildirgeni kibi, mayıs 18-de Ukrainanıñ paytahtında devlet reberliginiñ iştiraki ile hatıra aqşamı ve bir sıra medeniyet tedbiri ötkerilecek. Bir sıra tedbir Herson vilâyetinde de keçirilecektir.
Malüm olğanı kibi, Aqmescitniñ Rusiye şeer memuriyeti Qırımtatar Milliy Meclisine sürgünlik yıllığına bağışlanğan matem mitingini keçirmege resmiy şekilde yasaq etti.
Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.
Qırım işğalinden evel sürgünlik yıllığında Aqmescitte Bütünqırım matem mitingi keçirile edi, tedbirde onlarnen biñ insan iştirak ete edi.
