Moskvada Ğalebe Kününe bağışlanğan «Ölümsiz polk» aktsiyasında qırımtatarlar da iştirak etti.
Moskvadaki bayram tedbirlerinde yigirmi nefer qırımtatarı Ulu Vatan cenkinde iştirak etken semetdeşleriniñ adı ve soyadları ile fotosuretlerini köterdi.
Olarnıñ arasında Sovetler Birliginiñ eki defa qaramanı Amet-Han Sultan, Sovetler Birliginiñ qaramanı Abdul Teyfuk, Rusiye qaramanı (ölüminden soñ) Alime Abdennanova, Refat Mustafayev, İsmail Bulatov ve digerlerniñ fotoresimleri ile levhalar bar edi.
Qırım.Aqiqat bildirgeni kibi, mayıs 9-da Ulu Vatan cenkinde iştirak etken soy-soplarınıñ fotosuretleri ile çıqqan adamlarnen beraber Rusiye prezidenti Vladimir Putin de keçti. Onıñ qollarında babasınıñ fotoresimi bar edi.
Politsiyanıñ malümatına köre, aktsiyada 250 biñden ziyade insan iştirak etti.
«Ölümsiz polk» aktsiyası ilk sefer 2012 senesi Tomsk şeerinde olıp keçken edi. Bu sene oña federal status berildi ve aktsiya bütün Rusiyede, ve atta Mustaqil Devletler İttifağınıñ bazı memleketlerinde olıp keçti.
