Link açıqlığı

Saatnıñ esas haberi

Hersonda qırımtatar halqınıñ sürgünligi hatırasına şeer bağçasını açmaq isteyler


Hersonda qırımtatar halqınıñ Qırımdan sürgünliginiñ 71 yıllığı munasebeti ile hatıra skveriniñ temelini qoymağa ve 71 terekni oturtmağa planlaştıralar. Aktsiyanıñ teşkilâtçısı «Küreş» Qırımtatar medeniyet sport merkezi» hayriye teşkilâtı ola.

Teşkilâtçılarnıñ Qırım.Aqiqatqa bergen malümatına köre, tedbirniñ maqsadı – SSCB totalitar rejimi yapqan cinayetler, şu cümleden qırımtatar sürgünligi neticesinde elâk olğanlarnı añmaq ve kelecek nesillerge bu facianı unuttırmamaqtır.

Skverniñ temeli mayıs 17-de saat 10-da «Yubileynıy» kinoteatriniñ yanında qoyulacaq, er kes davetli.

Mayıs 18-de qırımtatar halqınıñ Qırımdan sürgün etilmesi qurbanlarınıñ hatıra künü oldı. Bu kün 1944 senesi qırımtatarlarnen tolu birinci eşelon Orta Asiyağa yollanılğan edi.

Yıl-yıldan Qırımda bu künge bağışlanğan kütleviy tedbirler, şu cümleden Qırım paytahtınıñ merkezinde matem mitingi keçirile edi. Lâkin Rusiye yarımadanı işğal etken soñ bunıñ kibi aktsiyalarnıñ keçirilmesini yasaq ettiler. Bu sene Qırımtatar Milliy Meclisi yerli akimiyetten miting keçirilmesine izin alamadı.

XS
SM
MD
LG