Herson vilâyetinde ukrain ve qırımtatar halqınıñ SSCB totalitar rejimi ile küreşi aqqında yarış işleri qabul etile. Mayıs 18-de Hersonda qırımtatar halqı sürgünliginiñ yıllığı munasebetinen keçirilecek tedbirde yarış ğaliplerini taqdirlemege planlaştıralar.
Bunı «Küreş» qırımtatar medeniyet sport merkeziniñ reberi İbragim Suleymanov Qırım.Aqiqatqa bildirdi.
Onıñ aytqanına köre, işler mayıs 14-ke qadar qabul etilecek.
Merkez reberi qayd etti ki, yarışta qırımtatarlarnıñ 1944 senesi olğan sürgünligi ve ukrain ve qırımtatar halqlarınıñ SSCB totalitar rejimi ile küreşine dair yazma eserleri taqdim etilecek ve olarnıñ arasından eñ güzel bediiy ve talebe işleri saylanacaq.
Teşkilâtçılar bugünki adise-vaqialar, Ukrainanıñ devlet mustaqilligi ve topraq bütünligi oğrunda küreş ile qıyaslavlar olacağını bekleyler.
Yarışta Qırım, Herson ve Herson vilâyeti umumtasil oquv yurtlarınıñ 11-inci sınıf talebeleri, litsey talebeleri ve aliy oquv yurtlarınıñ studentleri iştirak ete bile. Qırım studentleri işlerni tahallüs uydurıp teslim ete bileler. İşlerni bu adreske yollamağa teklif etile: kuresh.kherson@gmail.com
İşler ukraince, qırımtatarca ve rusça qabul etile. Yarış ğalipleri diplom, fahriy yarlıq ve bahşışlarnen taqdirlenecek.
Yarışnı «Küreş» qırımtatar medeniyet merkezi Herson vilâyeti devlet memuriyetiniñ yardımı ile teşkil etmekte.
