Qırımtatar Milliy Meclisiniñ reisi Refat Çubarov Ukrainada «Qırımnıñ birleşüv fondunı» meydanğa ketirmege teklif etti. Onıñ sermiyası Qırım işğalden azat etilgen soñ yarımadanıñ ğayrıdan tiklenmesine sarf etilecek. Bu ğayeni o Kiyevde «Qırımnıñ işğal şaraitlerinde mal-mülk ve topraq meseleleri» tögerek masasında seslendirdi, dep haber ete Qırım.Aqiqat.
«Anda (Qırımda – müel.) işğalden evel talap etken paradan daa ziyadesini talap etecek meseleler daa çoq olacaq. Mence, bunıñ kibi fond Ukraina qanunlarına köre meydanğa ketirilmeli. Menim fikirimce, devlet sermiyası bu fondnı maliye ete bile, çoq olmasın, belki de, memuriy işlerge berilsin yeter. Ekinciden halqara donorlar para bere bile ve bu sermiyanıñ bir qısmı Qırımda işğalden sebep peyda olğan menfiy aqibetlerniñ yoq etilmesine sarf etilecek», – dep ayta Çubarov.
Çubarovnıñ fikirince, halqara toplulıq bunıñ kibi bir fondqa maddiy yardım köstermeli, çünki Qırım ve onıñ sakinlerini işğalden qoruyamadı.
Meclis reisi dey ki, fondnıñ maliye etüv yollarından biri Rusiye Federatsiyası tarafından berilgen zarar içün ödenecek sermiya ve Qırımnı ğayrıdan tiklemek istegi olğan iş adamlarınıñ şahsiy parası ola bile.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
