Link açıqlığı

Saatnıñ esas haberi

Meclis azası: qırımtatarlar mayıs 18-de qıtaiy Ukrainağa matem mitingine kele bileler


Aqmescitte mitingniñ keçirilmesi yasaq etilse, qırımtatarlar mayıs 18-de Herson vilâyetiniñ Novoalekseyevka köyünde keçirilecek matem tedbirlerinde iştirak ete bileler. Bunı Herson regional Meclisiniñ reisi, Qırımtatar Milliy Meclisiniñ azası Asan Aliyev Qırım.Aqiqat mühbirine bildirdi.

«Tabiiy ki, biz adamlarnı bekleymiz, çünki bunıñ kibi müim matem mitingini anda keçirmek – imkânsız. Matem mitinginde iştirak etmek isteycek adamlar olacaq. Elbet de, Qırımdan adamlar olsa, biz olarnı qarşılarmız, olarğa duyğularını ifadelemek içün söz berirmiz», – dep ayttı Asan Aliyev.

Herson regional Meclisiniñ reisi qayd etti ki, keçken seneleri qırımtatarlarnıñ temsilciler eyyetleri sürgün olunğanlarnı beraber añmaq içün bir qaç avtobusnen Aqmescitke bara ediler, lâkin bu yıl öyle bir imkân yoq.

Herson vilâyetinde ananeviy tedbirler Novoalekseyevka qasabasında keçirilecek.

«Esas tedbir – qırımtatarlarnıñ Qırımdan sürgün etilmesiniñ 71 yıllığına bağışlanğan miting qırımtatarlar toplu yaşağan yerde – Geniçesk rayonınıñ Novoalekseyevka qasabasında keçirilecek, mında saat 10-da miting başlaycaq», – dedi Aliyev.

Tedbir planında dua, akimiyet vekilleriniñ çıqışı, Herson regional Meclisi reisiniñ muracaatı, sürgünlik yıllarınen bağlı veteranlarnıñ hatıraları, balalarnıñ icadiy çıqışları, sergi mevcut. Medeniyet evinde «Haytarma» filmini kösterecekler, sürgünlik qurbanlarınıñ hatırasına tiklenilgen abidege çeçekler qoyulacaq.

Mayıs 5-te Qırımtatar Milliy Meclisi Aqmescitniñ şeer memuriyetine 1944 senesi mayıs 18 künü qırımtatar halqı genotsidiniñ qurbanlarınıñ hatırasına matem mitinginiñ keçirilmesi aqqında haber etkenini bildirgen edi.

Aqmescit şeer memuriyetiniñ başı Gennadiy Baharev bildirdi ki, Aqmescit akimiyeti mayıs 18 künü qırımtatarlarnıñ sürgünligi 71 yıllığı munasebeti ile şeer merkezinde matem mitingini keçirmege izin bermez.

Onıñ aytqanına köre, Lenin meydanında «devlet bayramları munasebeti ile keçirilecek tedbirlerden ğayrı» diger kütleviy numayışlarnıñ keçirilmesi mümkün degil. Baharev şunı da qayd etti ki, yaqında meydan etrafında tamir işleriniñ keçirilmesi içün isar qoyulacaqtır.

Qırım ükümetiniñ baş nazir muavini Ruslan Balbek mayıs 18 künü arfesinde Qırım akimiyeti ve uquq qoruyıcı organları «ukrain siyasetçileri, qırımtatarlarnıñ yetekçileri Mustafa Cemilev ve Refat Çubarov tarafından azırlanğan kütleviy tarikler aqqında malümatnı elde etkenini» bildirgen edi.

Qırım prokurorı Natalya Poklonskaya yarımadanıñ uquq qoruyıcıları «mayıs 18 künü qırımtatar halqınıñ sürgünligi yıllığı ile bağlı olğan tariklerniñ ögüni almağa tırışacağı» aqqında bildirdi.

XS
SM
MD
LG