Qırım Devlet şurasınıñ reisi Vladimir Konstantinov Saraylı Qıyat köyünde (Mirnoye) natsistler kontslageriniñ qurbanlarına hatıra kompleksinde cami qurmağa söz berdi. Bunı o mayıs 8-de jurnalistlerge ayttı, dep haber ete Krım Media.
«Bütün dinlerge emiyet berip, cami qurucılığı beklenile. Mında er bir millet ve din temsilcileri elâk olğan edi. Bu felsefeniñ iç bir «maqsadı» yoq edi – er kesni yoq etmek kerek edi», – dedi spiker.
Konstantinovnıñ aytqanına köre, Saraylı Qıyattaki hatıra kompleksiniñ açılışı «büyük ve müim vatanperver leyhasınıñ başlanması» ola. Qırım akimiyeti camini ne vaqıt quracaq belli degil.
Mayıs 8-de Qırımnıñ Aqmescit rayonındaki Saraylı Qıyat köyünde bir vaqıtları «Krasnıy» sovhozında yerleşken natsist kontslageriniñ qurbanlarına hatıra kompleksi açıldı. Tarihçılarnıñ malümatına köre, Qırımnıñ natsist işğali yıllarında kontslagerde 15 biñ insan – Qızıl ordunıñ esirleri, partizan, yerli sakinler ve balalar – öldürilgen edi.
Hatıra kompleksiniñ qurucılığında tahminen 200 kişi iştirak etti. Qurucılıqnıñ birinci basamağına 100 mln ruble sarf etildi. Paranıñ bir qısmını Rusiyeniñ diger regionları berdi. Komplekste Ulu vatan cenkiniñ tarihını ögrenecek tedqiq merkezini meydanğa ketirmege planlaştıralar.
