Link açıqlığı

Kiyevde mayıs 10-da «Nivki» bağçasında Hıdırlez qırımtatar milliy bayramını qayd etecekler. Bunı tedbir teşkilâtçıları – Qırımtatar yaşlar merkezi bildirdi, dep haber ete Qırım.Aqiqat saytı.

«Bizim maqsadımız: Kiyevde yaşağan qırımtatarlarnı toplamaq ve birleştirmek, olarğa tanış ve dostlarnı tapmağa yardım etmek, yaşlarğa anane ve urf-adetlerimizni köstermek, halqımıznıñ oyun ve yırlarını unutmamaq, er kesni milliy ananelernen tanış etmek», – dep bildireler teşkilâtçılar.

Olarnıñ malümatına köre, bayram iştirakçileri qırımtatar yırlarını eşite, milliy oyunlarnı köre bilecekler. Farqlı yarış ve sport yarışları keçirilecek. Er kes milliy küreşte, armresling ve santıraçta iştirak ete bile. Ziyaretçilerni qırımtatarlarnıñ milliy yemeklerinen sıylamağa vade eteler. Teşkilâtçılar yanına suv, yemek, savut ve oturmaq içün uyğun olacaq bir şey almağa tevsiye eteler. Olarnıñ malümatına köre, bayram saat 10-dan saat 19-ğa qadar devam etecektir. Tedbir Qırımtatar Milliy Meclisiniñ yardımı ile keçirile.

Qırım.Aqiqat bildirgeni kibi, mayıs 3-te «Şaherezada» medeniyet eglence merkeziniñ yanında (Bağçasaray rayonı, Aqmescit-Bağçasaray yolunıñ 25-inci kilometri) Qırımnıñ Rusiye akimiyetiniñ teşebbüsi ile Hıdırlez qırımtatar milliy bayramı qayd etildi.

Qırım akimiyeti bayramğa 35-40 biñ kişi kelgenini bildire. Bayramnıñ teşkil etilmesine qoşulmağan Qırımtatar Milliy Meclisi tedbirde eñ ziyad 5-6 insan iştirak etkenini ayta. Temsil organı semetdeşlerini Qırımdaki «Hıdırlezge» barmamağa çağırdı.

XS
SM
MD
LG