Link açıqlığı

Celâl: Qırımda yaqalanğan Meclis reisiniñ muavini Ahtem Çiygoznıñ soylarına körüşüvde red ettiler


Cumaaqşamı künü, mays 7-de, Qırımda yaqalanğan Meclis reisi muavini Ahtem Çiygoznıñ apayı ömür arqadaşı ile körüşmege tırıştı, amma oña izin bermediler.

Bunı Qırım.Aqiqatqa Meclis reisiniñ muavini Nariman Celâl bildirdi.

«SİZOda onıñ qabaatlı olıp, kartserde bulunğanını qayd eteler, şunıñ içün körüşüv imkânsız eken», – dey Celâl.

Onıñ sözlerine köre, advokat Çiygoznıñ kartserge avuştırılması sebebini añlatacaq vesiqanıñ kösterilmesini talap ete.

«İşbu vesiqanı elde etse, itiraz arizasını berecek. Advokantnıñ malümatına köre, Ahtem Çiygoznıñ kartserge avuştırılmasına iç bir sebep yoq edi», – dey Celâl.

Onı 2015 senesi yanvar ayında 2014 senesi fevral 26 künü «kütleviy çatışmalarnıñ teşkil etilmesi ve iştirak etmesinde» şeklep, taqiqat çerçivesinde yaqaladılar. Çiygoznı 2015 senesi fevral 19-ğa qadar apiske aldılar, soñra da bu müddetni mayıs 19-ğa qadar arttırdılar.

Çarşenbe künü, mayıs 6-da, Qırımtatar Milliy Meclisi reisiniñ birinci muavini Nariman Celâl bildirdi ki, Qırımda Aqmescit SİZOsında bulunğan Qırımtatar Milliy Meclisi reisiniñ muavini Ahtem Çiygoznı kartserge attılar.

Mecliste deyler ki, böyleliknen Çiygozğa basqı etip, kerek olğan şaatlıqnı elde etmege isteyler.

XS
SM
MD
LG