Link açıqlığı

Qırımtatar Milliy Meclisi Aqmescit akimiyetinden qanun boyunca kütleviy tedbirlerniñ keçirilmesi içün kelişken yerde qırımtatar sürgünliginiñ yıllığında matem mitingini keçirmege izin soray.

Bunı Qırımtatar Milliy Meclis reisiniñ muavini İlmi Ümerov, Aqmescit akimiyetiniñ mitingni şeer merkezinde keçirmege izin bermegenini izaatlap, bildire.

Aqmescit şeer memuriyetiniñ başı Gennadiy Baharev şunı bildirdi ki, şeer memuriyetine qırımtatar halqınıñ temsilcileri ve cemaat teşkilâtlarından mütenasip muracaat kelgen eken. «Olar kütleviy numayışlarnı Lenin meydanı, Zenaat birligi Evi yanında keçirmege planlaştırğanlar. Amma biz buña izin bermege planlaştırmaymız», – dedi o.

«Baharev şeerni yahşı bilmese kerek. Biz, şimdiki akimiyetniñ qanuniyetine köre, mitingni Lenin meydanında, Kirova soqağı boyunca Zenaat birligi Evi yanında degil de, Kiyevskaya soqağında yerleşken Zenaat birligi Medeniyet Evi yanında keçirmege izin sorağanmız, farqlı yerlerdir. Soñkisi, qanun boyunca, kütleviy tedbirlerniñ keçirilmesi içün ayırılğan yerdir…», – yazdı Facebookta İlmi Ümerov.

Mayıs 5-te Qırımtatar Milliy Meclisi Aqmescitniñ şeer memuriyetine 1944 senesi mayıs 18 künü qırımtatar halqı genotsidiniñ qurbanlarınıñ hatırasına matem mitinginiñ keçirilmesi aqqında haber etkenini bildirgen edi.

Keçken sene ananeviy matem mitinginiñ Aqmescit merkezinde keçirilmesi yasaq etilgen edi

Evel Qırım ükümetiniñ baş nazir muavini Ruslan Balbek mayıs 18 künü arfesinde Qırım akimiyeti ve uquq qoruyıcı organları «ukrain siyasetçileri, qırımtatarlarnıñ yetekçileri Mustafa Cemilev ve Refat Çubarov tarafından azırlanılğan kütleviy tarikler aqta malümatnı elde etkenini» bildirdi.

Qırım prokurorı Natalya Poklonskaya yarımаdanıñ uquq qoruyıcıları «mayıs 18 künü qırımtatar halqınıñ sürgünligi yıllığı ile bağlı olğan tariklerniñ ögüni almağa tırışacağı» aqta bildirdi

XS
SM
MD
LG