Link açıqlığı

Baharev: akimiyet qırımtatarlarğa mayıs 18 künü matem mitingini keçirmege izin bermez


Aqmescit akimiyeti mayıs 18 künü qırımtatarlarnıñ sürgünligi 71 yıllığı munasebeti ile şeer merkezinde matem mitingini keçirmege izin bermez. Bunı Aqmescit şeer memuriyetiniñ başı Gennadiy Baharev bildirdi, – haber ete «Krım Media».

O şunı da bildirdi ki, şeer memuriyetine qırımtatar halqınıñ temsilcileri ve cemaat teşkilâtlarından mütenasip muracaat kelgen eken.

«Olar kütleviy numayışlarnı Lenin meydanı, Zenaat birligi Evi yanında keçirmege planlaştırğanlar. Amma biz buña izin bermege planlaştırmaymız», – dedi o.

Onıñ sözlerine köre, Lenin meydanında «devlet bayramları munasebeti ile keçirilecek tedbirlerden ğayrı» diger kütleviy numayışlarnıñ keçirilmesi mümkün degil. Baharev şunı da qayd etti ki, yaqında meydan etrafında tamir işleriniñ keçirilmesi içün isar qoyulacaqtır.

«Nasıldır tedbirlerniñ keçirilmesi imkânsız olur», – dedi o.

Qırım prokurorı Natalya Poklonskaya yarımаdanıñ uquq qoruyıcıları «mayıs 18 künü qırımtatar halqınıñ sürgünligi yıllığı ile bağlı olğan tariklerniñ ögüni almağa tırışacağı» aqta bildirdi

Evel Qırım ükümetiniñ baş nazir muavini Ruslan Balbek mayıs 18 künü arfesinde Qırım akimiyeti ve uquq qoruyıcı organları «ukrain siyasetçileri, qırımtatarlarnıñ yetekçileri Mustafa Cemilev ve Refat Çubarov tarafından azırlanılğan kütleviy tarikler aqta malümatnı elde etkenini» bildirdi.

Mayıs 5-te Qırımtatar Milliy Meclisi Aqmescitniñ şeer memuriyetine 1944 senesi mayıs 18 künü qırımtatar halqı genotsidiniñ qurbanlarınıñ hatırasına matem mitinginiñ keçirilmesi aqqında haber etkenini bildirgen edi.

Keçken sene ananeviy matem mitinginiñ Aqmescit merkezinde keçirilmesi yasaq etilgen edi

XS
SM
MD
LG