Baş ofisi Ankarada olğan Qırımtatarlarnıñ medeniyet ve yardımlaşma dernegi Türkiye tasil nazirligine Türkiye mekteplerinde qırımtatar tili derslerini kirsetmege teklif etti. Bunı cumaaqşamı künü, mayıs 7-de, QHA agentligi bildire.
Qırımtatar tilini Türkiye mekteplerinde «Mevcut olğan til ve şiveler» programmasına kirsetmege teklif ettiler. Qırımtatarlarnıñ medeniyet ve yardımlaşma dernegi zaruriy şeylerni temin etmege azırlığını bildirdi.
Mektüpte aytılğanı kibi, 1783 ve 1922 seneleri, «1783 senesi çar rejiminiñ basqısı altında milliondan ziyade qırımtatarı zemaneviy Türkiye territoriyasına köçmege mecbur oldı».
«1883-1914 seneleri ulu mütefekkir ve maarifçi İsmail Gasprinskiyniñ «Terciman» gazetası sayesinde qırımtatar tili türk dünyasınıñ umumiy timsali edi, bugünde-bugün ise UNESKO tarafından yoq olayatqan tillerniñ cedveline kirsetilgen»,– denile beyanatta
Qırımtatarlarnıñ medeniyet ve yardımlaşma dernegi şimdi Qırımda 15 milliy mektep bar olğanını qayd etti. Bunıñ ile qırımtatarlarnıñ tuvğan tiline Qırım müendis-pedagogik universiteti ve Vernadskiy adına QFU Tavriya akademiyası negizinde ögreteler. Bütün bular Türkiye yardımı ile açılğan edi , – yaza neşir.
Türkiyede qırımtatar tilini Gazi Universitetinde zemaneviy türk şiveleri ve edebiyatı kafedrasında ögreteler. Bundan da ğayrı qırımtatar tili kurslarını Qırımtatarlarnıñ medeniyet ve yardımlaşma dernegi de azırlay.
