Link açıqlığı

Saatnıñ esas haberi

Qırımda «Ukrain medeniyet merkeziniñ» açılışını taqdim ettiler


Cumaaqşamı künü, mayıs 7-de, Aqmescitte faaller ukrain tili ve medeniyetini canlandıracaq «Ukrain medeniyet merkeziniñ» açılışını taqdim ettiler, dep haber ete Qırım.Aqiqat.

Merkezniñ temel qoyucıları matbuat konferentsiyasında bildirdiler ki, onıñ esas vazifesi «Qırım yarımadasında yaşağan ukrain halqını birleştirmektir».

«Ukrain medeniyeti Qırımda assimilâtsiyağa oğratıla, bu sebepten bizler yarımadada ukrain tilini saqlap qalmağa tırışacaqmız, bundan ğayrı, Ukrainanıñ cemaat kütüphanesini meydanğa ketirmek isteymiz. Bu meselede Ukrainanıñ yardımına ümüt etemiz», – dep ayttı merkez temsilcilerinden biri Leonid Kuzmin.

Teşkilât faaliyetiniñ yönelişleri arasında Qırımda ukrain kinosınıñ künleri, edebiyat oquvları ve, belki de, bala resimleriniñ yarışı olacaq.

Merkezniñ daa bir vekili Veldar Şukurciyev qayd etti ki, bu teşkilât siyasiy degil, cemaat teşkilâtıdır.

«Teşkilât al-azırda Qırımda olğan qanunlardan tış areket etmeycek», – dedi o.

Merkezniñ binası yoq, teşkilâtçılarnıñ kira almaq içün paraları yoq. Faaller işbu teşkilâtnıñ faaliyetine Qırımda hayriye parası yardım etecegine ümüt eteler.

Leonid Kuzmin ve Veldar Şukurciyev – ukrain şairi Taras Şevçenkonı añma aktsiyasında mart 9-da Aqmescitte yaqalanğan faallerden biri.

Malüm olğanı kibi, faalller Aleksandr Kravçenko, Leonid Kuzmin ve Veldar Şukurciyev mart 9-da ukrain şairi Taras Şevçenkonı añma tedbirinde yaqalanğan ediler.

Mart 12-de mahkeme olıp keçti, faallerniñ ukrain timsallerini qullanğanlarından sebep cezası belgilendi. Mahkeme er bir faalni 40 saatlik mecburiy işler ile cezaladı.

XS
SM
MD
LG