Cumaaqşamı künü, mayıs 7-de, «Hromadske. Qırım» ukrain yayını ilk sefer efirge çıqa. Canlı yayında üç alıp barıcı çalışacaq – Osman Paşayev, Sevgil Musayeva-Borovik ve Sergey Mokruşin. Olar Rusiyeniñ nezareti altında qalğan yarımadanıñ qıyınlıqları aqqında tarif etecekler. Dialogğa ekspertlerniñ davet etilmesi beklenile, bunıñnen beraber jurnalistler Qırımdan malümat «tapacaqlar».
Bunı leyha alıp barıcılarından biri Sergey Mokruşin Qırım.Aqiqatqa bildirdi.
«Anda (Qırımda – muar.) mustaqil jurnalistler aman-aman qalmadı. Lâkin bizler anda qalğanlarnen bağ tutmağa tırışacaqmız, Qırımdan malümat tapıp, onı köstermege tırışacaqmız. Ümüt etemiz ki, Ukraina ükümeti, Ukraina aikmiyeti Qırımğa daa çoq diqqat ayıracaq. Qırımda yaşağanım soñki yıl devamında Qırım ukrain ükümetiniñ kün tertibinde yoq kibi fikir peyda ola edi», – dedi Mokruşin.
Muarrirlerniñ maqsadı – Qırım ve Ukraina seyircilerini yarımada vaziyetinen tanış etmek, Kiyev ve Qırım arasında dialognı qurmaq, kütleviy haber vastalarınıñ yardımı ile ortağa çıqqan meselelerni al etmek.
Yayın cumaaqşamı künü saat 19:00 «Hromadske telebaçennâ» telekanalında çıqacaq, qırımlılar yayınnı internetten seyir ete bileler.
Ukraina malümat siyaseti naziri Yuriy Stets Qırımda diñlemesi mümkün olacaq ukrain radiosınıñ açılmasını ilân etken edi.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler. 2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı.
Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar. Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
